Қарағанды облысының Саран қаласында кәріз жүйесі қайта жаңартылып, су құбыры желілері жаңалануда. Жаңа кәріз желілері бұған дейін мүлде болмаған жерлерде де тартылады.
Кәріз жүйесін жаңғырту жобасы екі жылға жоспарланған. Биылғы маусымда жұмыстар «Горняк» шағын ауданында жүргізілуде. Құбырларды төсеу кезінде көлденең бұрғылау әдісі қолданылады — бұл дегеніміз жол жабынын бұзып, үлкен шұңқыр қазудың қажеті жоқ.
Келесі жылы кәріз құбырларын төсеу жұмыстары «Химик» шағын ауданында жалғасады деп жоспарлануда. Қазір бұл учаскеге қажетті жобалық-сметалық құжаттама дайындалып жатыр.
Су құбыры желілерін де кезең-кезеңімен жаңарту көзделген. Бұл үш жылға есептелген жоба. Биыл 92 шақырым құбырды ауыстыру жоспарланған, соның 60 шақырымы төселіп үлгерді. Қалған 32 шақырымы күзгі суық түскенге дейін жаңартылады.
Сонымен қатар, Саранда су көтеру нысанын жаңғырту жұмыстары басталды. Қазірдің өзінде ішкі су құбырлары, сорғылар мен өзге де жабдықтар жаңартылып, заманауи датчиктер орнатылды. Қазіргі уақытта трансформаторлық қосалқы станциялар мен барлық электр тарату элементтері ауыстырылып жатыр. Бұл су көтеру жүйесіне үздіксіз әрі тұрақты электр қуатын беруге мүмкіндік береді.
— Жаңғыртылған жүйе қала тұрғындарын үздіксіз сумен қамтуға мүмкіндік береді. Бұрын трансформаторлық қосалқы станциялар мен электр желілерінің тозуына байланысты жиі апаттар болып, сорғылар тоқтап қалатын, соның салдарынан су беру тоқтайтын еді, — деп түсіндірді Саран қаласы әкімдігінің баспасөз хатшысы Думан Алимжанов.
Жұмыстардың басым бөлігі тұрғындарға ыңғайсыздық тудырмас үшін түнгі уақытта жүргізілуде.
