Сайлауалды күн бірнеше форматта өтті. Еңбек ұжымдары және кәсіби қауымдастық өкілдерімен кездесулер ұйымдастырылып, экологиялық іс-шаралар өтіп, мобильді штабтар жұмыс істеді. Партиялар өңірлерге сапарларын жалғастырып, тұрғындармен әлеуметтік сала, өнеркәсіп, инфрақұрылым, жұмыспен қамту, экология және аумақтарды дамытуға қатысты мәселелерді талқылады. Сайлау науқанының күн тәртібінде жария мәлімдемелер мен оған қатысушылардың өзара сын-пікір алмасуы да ерекше орын алды.
«Әділет» партиясы: Өңірлерде еңбек ұжымдарымен кездесіп, әлеуметтік қорғау, ғылым, өнеркәсіп және жастарды қолдау мәселелерін кеңінен жан-жақты талқылады.
Жалпыұлттық социал-демократиялық партиясы: Қонаевта зейнеткерлермен және белсенділермен кездесіп, белсенді ұзақ өмір сүру орталығының мәселесін талқылады және ұсыныстарын тыңдады.
«Байтақ» партиясы: Астанада экологиялық сенбілік өткізіп, қоқыс жинады. «Іле-Балқаш» резерватында биоалуантүрлілік, браконьерлік және экотуризм мәселелерін кеңінен талқылады.
Қазақстан Халық партиясы: Павлодардағы кәсіпорындарда отандық өндірісті қолдау, жұмыс орындарын сақтау және еңбек жағдайларын жақсарту мәселелері нақты көтерілді.
«Ауыл» партиясы: Қостанайда «Менің Қазақстаным» акциясы өтіп, Павлодарда жастармен жұмыспен қамту, білім беру және ауылды дамыту талқыланды.
«Ақ жол» партиясы: Екібастұзда коммуналдық және энергетикалық инфрақұрылым талқыланды. Қызылордада шағын бизнес өкілдерімен Салық кодексі мәселелері жан-жақты қаралды.
«Respublica» партиясы: Алматы және Ақтөбе облыстарында еңбек ұжымдарымен кездесіп, өндіріс, кадр даярлау, маман тапшылығы және шикізатты талқылады.
Осылайша, партиялардың өңірлердегі сайлауалды жұмысы бірден бірнеше бағыт бойынша жалғасып жатыр. Кандидаттар сайлаушылармен дәстүрлі кездесулер өткізумен қатар, кәсіби ұжымдармен жұмыс істеп, қоғамдық және экологиялық іс-шаралар ұйымдастырып, шалғай елді мекендерді қамту үшін көшпелі форматтарды да пайдаланып жүр. Сонымен бірге сайлау науқаны тұрғындарды толғандырған мәселелерді талқылаумен ғана шектелмей, сайлауға қатысушылар арасындағы өзара ұстаным алмасумен де қатар жүруде.
