Қазақстан Республикасы Мәдениет және ақпарат министрлігі республикалық «Кітап оқитын ұлт» марафоны финалының негізгі шарттарын жариялады. Көп кезеңді іріктеу нәтижесінде анықталатын еліміздің «Үздік 10 оқырманының» әрқайсысы бас жүлде — 10 миллион теңгеден алады. Бұл атаққа жету үшін қатысушылар 7 бағыттың біріне тіркеліп, алты ай бойы кітап оқиды, командалық өңірлік жарыстарға және жеке сынақтарға қатысады.
Байқаудың қорытынды кезеңі Астана қаласында өтеді. Оған еліміздің барлық 20 өңірінен 200 финалист жиналады.
Қыркүйек айынан бастап марафонның ресми сайтында 7 байқау бағыты бойынша қатысушыларды тіркеу басталды. Әрбір ниет білдіруші өз қызығушылығына сәйкес бағытты таңдай алады. Тіркеу аяқталғаннан кейін қатысушылар марафонның негізгі кезеңіне өтеді: алты ай ішінде таңдалған бағыт бойынша ұсынылған 15 кітапты оқуы тиіс.
Жеңімпаздарды іріктеу кезең-кезеңімен жүргізіліп, бүкіл елді қамтиды. Байқау сынақтары мектептер, ұйымдар, аудандар, қалалар және өңірлер деңгейінде біртіндеп өткізіледі. Өңірлік кезеңде қатысушылар командалық форматта бақ сынайды. Дәл осы кезеңде 7 бағыттың әрқайсысы бойынша үздік командалар анықталады.
Өңірлік кезеңнің жеңімпаздары ақшалай сыйлықтарға ие болады:
- 1-орын — 600 000 теңге;
- 2-орын — 450 000 теңге;
- 3-орын — 300 000 теңге.
Өңірлік кезеңде 1, 2 және 3-орын алғандар — бұл еліміз бойынша шамамен 4 000 қатысушы — байқауды жеке форматта жалғастырып, «Жыл оқырманы» деген құрметті атаққа таласуға мүмкіндік алады.
Бұл кезеңде қатысушылар күрделірек байқау тапсырмаларын орындайды: эссе жазып, оқыған кітаптары бойынша сарапшылар алқасының алдында көпшілік алдында таныстырылым жасайды. Осы кезеңнің қорытындысы бойынша Қазақстанның 20 өңірінің әрқайсысынан оқыған шығармаларын терең түсінетінін және көпшілік алдында сөйлеудің жоғары деңгейін көрсеткен 10 үздік оқырманнан анықталады.
Еліміздің барлық 20 өңірінен іріктелген үздік оқырмандар — жалпы саны 200 финалист — Астана қаласында өтетін республикалық «Жылдың 10 оқырманы» финалына қатысады. Финал барысында қатысушылар тестілеуден, бірқатар арнайы байқау кезеңдерінен өтіп, республикалық деңгейдегі қазылар алқасының алдында көпшілік алдында сөз сөйлейді.
Финалдық сынақтардың қорытындысы бойынша республиканың үздік 10 оқырманы анықталады. Он жеңімпаздың әрқайсысы марафонның бас жүлдесі — 10 миллион теңгеге ие болады.
Осылайша, «Оқитын ұлт» марафоны Қазақстандағы мәдени-ағартушылық жобалар арасындағы жүлде қоры ең қомақты жобалардың біріне айналады.
