Наурызнама онкүндігі аясында 16 наурыз – Мәдениет және салт-дәстүр күніне орай Қарағанды қаласында орналасқан 5451 әскери бөлімінде қазақтың ұлттық салттарының бірі – тұсаукесер рәсімі ұйымдастырылды.
Тағылымға толы іс-шараның басты мақсаты – ұлттық құндылықтарды дәріптеу, әскери қызметшілер мен олардың отбасылары арасында салт-дәстүрлерді кеңінен насихаттау болды.
Салтанатты рәсім барысында бүлдіршіннің тұсауын әскери бөлім командирі полковник Рауан Сарсенгалиевич Омаров кесіп, балаға ақ жол, жарқын болашақ тіледі. Тұсаукесер – қазақ халқының ежелден келе жатқан дәстүрлерінің бірі. Бұл рәсім арқылы балаға өмір жолы ашық, қадамы нық, болашағы жарқын болсын деген ақ тілектер айтылады.
Аталған мәдени іс-шара әскери бөлімнің Аналар кеңесі мен Сарбаздар аналарының кеңесімен бірлесе ұйымдастырылды. Шара барысында қатысушылар қазақ халқының тәрбиелік мәні зор салт-дәстүрлері туралы айтып, ұлттық құндылықтардың маңызына тоқталды.
Ұйымдастырушылардың айтуынша, мұндай тағылымды шаралар әскери қызметшілер арасында бірлік пен ынтымақты нығайтып қана қоймай, жас ұрпаққа ұлттық тәрбиені насихаттауға үлкен үлес қосады. Іс-шара соңында қатысушылар балаға ақ баталарын беріп, ізгі тілектерін білдірді.
ҚР ІІМ ҰҰ “Орталық” ӨңҚ Баспасөз қызметі
