Ақтоғай ауданы өнеркәсіп әлеуетін арттырып, инвестиция тартуда. Үш ірі жоба іске қосылды – табиғи гипс пен мыс кенін өндіру, құрамында мыс бар өнімдерді өндіру, сондай-ақ гидрометаллургиялық тәсілмен катодты мыс шығару зауыты.
Өткен жылдың қорытындысы туралы Өңірлік коммуникациялар қызметінің брифингінде аудан әкімі Абылай Аманжолов баяндады. Оның айтуынша, аудан негізгі әлеуметтік-экономикалық көрсеткіштер бойынша оң динамиканы сақтап қалды. Базалық сала бұрынғысынша ауыл шаруашылығы болып қалып отыр.
«Ауыл аманаты» бағдарламасы бойынша 11 кәсіпкер несие алып, бір ауыл шаруашылығы кооперативі қаржыландырылды. «Бір ауыл – бір кооператив» жобасы аясында SAPA MIX кооперативі құрылды. Облыс әкімдігі мен «Сарыарқа» ӘКК қолдауымен Қарағандыда «Ақтоғай өнімдері» коммуналдық дүкені ашылды.
Облыстық жол картасы бойынша екі инвестициялық жоба жүзеге асырылды: 500 басқа арналған мал бордақылау алаңы мен асыл тұқымды ІҚМ өсіру шаруашылығы. Тоғыз жас кәсіпкер аудан әкімінің гранттарына ие болды, тағы бесеуі мемлекеттік қолдауға ие болды.
Коммуналдық инфрақұрылымды жаңғырту жалғасуда. 24 елді мекен орталықтандырылған сумен қамтамасыз етілді, шағын ауылдарда блокты-модульді станциялар орнатылды. Сарышағанда сорғы станциясы жаңартылып, суды тұщыландыру жабдығы іске қосылды. Ақтоғай кентінде резервуармен су құбырының төртінші кезегі салынып жатыр, жобаны аяқтау осы жылға жоспарланған.
Аудан орталығында кәріз жүйесі, Шашубай ауылында қуаты 10,5 МВт қазандық салынуда. Жолдарды, оның ішінде Ақтоғай – Шылым – Ақжарық тас жолының учаскелерін және Бектау-атаға кіреберісті, сондай-ақ «Ауыл – ел бесігі» жобасы бойынша ауылдық көшелерді жөндеу жалғасуда.
Алты білім беру нысаны жөнделді, пәндік кабинеттермен жарақтандыру 95% -ға дейін жеткізілді. Спорттық инфрақұрылым дамуда: Сарышағанда спорт кешені мен Қызыларайда ангар залы салынды, бірқатар ауылдарда алаңдар ашылды. Ауылдық спорт құрылымдарын біріктіретін «Ақтоғай спорт клубы» құрылды. Жоспарда – Сәуле және Ақши ауылдарында ангар залдарын, сондай-ақ Ақжайдақ, Ортадересін және Шашубай кентінде заманауи кешендерді салу белгіленген. Екі жылда ауданда бес жаңа спорт нысаны ашылады деп күтілуде.
Денсаулық сақтау саласында ауылдық медицинаны жаңғырту жобасы бойынша он нысан пайдалануға беріліп, жабдықтар мен алты санитарлық автокөлік сатып алынды.
Аудан су тасқыны кезеңіне дайындалуда: алты елді мекенде су тасқынына қарсы жұмыстар жүргізілді, бөгеттер бекітілді, өзен арналары тазартылды, инертті материалдар, техника мен отын дайындалды, қар шығару ұйымдастырылды.
Ауданды дамыту жұмыстары инвестицияға, бизнесті қолдауға, аграрлық секторға және әлеуметтік инфрақұрылымды жаңартуға баса назар аударумен жалғасады.
