Қарағанды облысында ерекше білім беру қажеттіліктері бар балалар мен жасөспірімдерді қолдау күшейтілуде — қолжетімді білім беруден бастап спортпен айналысуға және алғашқы жұмыс орындарын ұсынуға дейін. Бұл мәселелер өңір әкімі Ермағанбет Бөлекпаевтың ата-аналармен, бейінді басқармалар өкілдерімен және қала-аудан әкімдерімен кездесуінде талқыланды.
Кездесуде негізгі тақырыптардың бірі — мектептен кейін білім алуды жалғастыру мүмкіндігі болды. Білім басқармасының басшысы Дулат Жекебаевтың айтуынша, мүмкіндігі шектеулі түлектердің басым бөлігі оқуын жалғастыруды таңдайды.
— Өткен жылы тоғызыншы сыныпты ерекше қажеттіліктері бар 274 оқушы аяқтады, биыл 237 түлек болады. Облыста 51 колледж жұмыс істейді, оның 38-інде ұсынылған мамандықтар бойынша оқуға қажетті жағдайлар жасалған. Тоғызыншы сынып түлектерінің көпшілігі колледждерге түсуді жоспарлап отыр, ал он оқушы мектепте оқуын жалғастырады. Он бірінші сыныпты 40 оқушы аяқтайды: олардың 25-і колледждерге, 15-і жоғары оқу орындарына түсуді көздеп отыр. Тағы он колледж түлегі университеттерде оқуын жалғастыруды жоспарлап отыр, —деді ол.
Оның айтуынша, жоғары оқу орындарымен кездесу өткізілген. Білім беру мекемелері мұндай студенттерді қабылдауға дайын, квоталар мен қажетті жағдайлар қарастырылған.
Облыс әкімі жағдайды қосымша зерделеп, қажет болған жағдайда түлектерге жоғары оқу орындарына түсуін жеңілдету үшін дайындық курстарын ұйымдастыруды тапсырды.
Инклюзивті білім беру басым бағыттардың бірі болып қала береді. Өңірде 17 мыңнан астам балаға психологиялық-медициналық-педагогикалық кеңес қорытындысы берілген, олардың 92,1%-ы түрлі қолдау түрлерімен қамтылған — балабақшадан бастап колледждерге дейін.
Көмек аясын кеңейту үшін психологиялық-педагогикалық түзету кабинеттерін ашу жоспарлануда: қосымша кабинет Қарағандыда, сондай-ақ Бұқар жырау және Шет аудандарында ашылады. Облыс балабақшаларында қосымша топтар құрылып, шамамен 400 баланы орынмен қамтуға мүмкіндік береді. Сонымен қатар Теміртау мен Шахтинск қалаларында аутизм спектрі бұзылыстары бар балаларды қолдау орталықтарын ашу мәселесі қарастырылуда.
Кездесуде бейімделген спортты дамыту мәселесі де жеке талқыланды. Биыл мемлекеттік әлеуметтік тапсырыс аясында мүгедектігі бар балаларға арналған орындар саны 240-қа дейін арттырылды, оның ішінде зияткерлік бұзылыстары бар балаларға арналған жеңіл атлетика секцияларында 48 орын қарастырылған. Ата-аналар бейімделген жүзу секцияларын және 18 жастан асқан жастарға арналған бағдарламаларды кеңейтуді ұсынды. Өңір басшысы бейінді ведомстволарға тиісті ұсыныстар әзірлеуді тапсырды.
Тағы бір маңызды мәселе — жасөспірімдерді жұмыспен қамту. Биыл олар үшін «Жасыл ел» бағдарламасы аясында 50 жұмыс орны қарастырылған, негізінен зияткерлік ерекшеліктері бар жастарға арналған. Жұмыс орындары қолжетімділік талаптарын ескере отырып, ғимараттардың бірінші қабаттарында жабдықталады, ал жасөспірімдер отбасы мүшелерінің сүйемелдеуімен жұмыс істей алады.
Сонымен қатар шамамен он адамды Мансап орталығы арқылы жұмысқа орналастыру жоспарланып отыр — мысалы, курьер немесе қызмет көрсету саласында көмекші ретінде.
— Жұмыс барысында қауіпсіздік пен жайлы жағдайларды қамтамасыз ету маңызды. Мұндай кездесулер мәселелерді ата-аналармен және бейінді ведомстволармен тікелей талқылап, бірлесіп шешім табуға мүмкіндік береді, — деп атап өтті Ермағанбет Бөлекпаев. — Біз мұндай кездесулерді тұрақты түрде өткізіп, туындайтын мәселелерді кезең-кезеңімен шешуге келістік.
«Батыл жүрек» қайырымдылық қорының тең құрылтайшысы Оксана Югайдың айтуынша, мұндай формат қазірдің өзінде нәтижесін беріп жатыр.
— Көптеген мәселелер шешімін тауып жатыр, жаңа бастамалар пайда болуда. Қолдау көрсету мүмкіндіктері тек балалар үшін ғана емес, 18 жастан асқан жастар үшін де кеңейіп келеді, — деді ол.
Дереккөз: Қарағанды облысының әкімдігі
