Премьералар, гастрольдік сапарлар және фестивальдік марапаттар — Қарағандыдағы К. С. Станиславский атындағы орыс драма театры соңғы жылдардағы ең мазмұнды кезеңдердің біріне айналған өзінің 95-маусымын аяқтап отыр. Шығармашылық жылдың қорытындысы 26 маусым күні өтетін «Сүйікті театрымызға – 95!» атты мерекелік кеште шығарылады.
Салтанатты шара сағат 18:30-да театр алдындағы алаңда басталады. Қонақтарды қаланың ең көне театрының тарихына арналған театрландырылған интермедия, жанды оркестрдің концерті және тақырыптық миниатюралар күтеді.
Ресми бөлім көрермендер залында жалғасады. Мұнда театр қызметкерлеріне ведомстволық марапаттарды табыстау рәсімі өтеді. Одан кейін көрермендерге қалалық театрлардың және Теміртау жас көрермендер театрының әртістері қатысатын ауқымды мерекелік концерт ұсынылады.
Сонымен қатар, кеш бойы фойеде арнайы баннер орнатылып, онда кез келген адам театр ұжымына өз тілегі мен лебізін қалдыра алады.
Мерейтойлық маусым театрда Александр Островскийдің пьесасы бойынша қойылған «Доходное место» спектаклімен ашылып, биылғы жылдың ең көп талқыланған премьераларының біріне айналған мистикалық «Вий» драмасымен қорытындыланды. Сондай-ақ Антон Чеховтың «Чайка» қойылымы да көрермендердің ерекше қызығушылығын тудырып, аншлагпен өтті.
– Қай премьерамыз көрерменге көбірек ұнағанын нақты айту қиын, өйткені «Вийдің» қойыла бастағанына көп болған жоқ. Дегенмен оның алғашқы төрт көрсетілімі аншлагпен өтті. Сондықтан осы маусымдағы ең көп көрермен жинаған премьера дәл осы «Вий» шығар деп ойлаймын. Иә, пікірлер әртүрлі. Өйткені бұл классикалық спектакль емес, бірнеше автордың шығармаларын біріктірген композиция. Мәселен, «Вийде» Оскар Уайльдтың мәтіндері де қолданылады. Мұндай шешімді бәрі бірдей қабылдай бермейді. Алайда залдың толуына қарағанда, көрермендердің басым бөлігіне ұнайды, – дейді театрдың көркемдік жетекшісі Андрей Марычев.
Маусым фестивальдік қызмет тұрғысынан да табысты болды. Театр ширек ғасырдан кейін алғаш рет Николай Гогольдің «Ревизор» спектаклімен Петропавлға гастрольдік сапар жасап, сондай-ақ Алматы қаласында өнер көрсетті. Әйелдер жасаған резонансты қылмыстар туралы оқиғаларға негізделген «7» деректі қойылымы Тараздағы халықаралық фестивальде қазылар алқасының жоғары бағасына ие болды.
Күзде театр «Вий» спектаклін Павлодарда өтетін ірі фестивальде таныстыруды жоспарлап отыр.
– 2026 жылдың күзінде Павлодардағы ауқымды фестивальге қатысуды көздеп отырмыз. Ол жаққа «Вий» спектаклін апарғымыз келеді. Фестивальдің ережелерімен таныстық, талаптарына сәйкес келетін сияқтымыз. Дегенмен түпкілікті шешімді арнайы комиссия қабылдайды. Қазір олардың жауабын күтіп отырмыз, бізді қабылдай ма, жоқ па – жақын арада белгілі болады, – дейді Андрей Марычев.
Мерейтойлық маусым кәсіби марапаттарға да бай болды. Театр әртісі Иван Немцев «Парасат» орденімен марапатталды. Ирина Городкова екінші пландағы үздік актриса атанса, Светлана Потёмкина «Жыл әртісі» атағына ие болды.
Өзгерістер театрдың шығармашылық өмірімен ғана шектелген жоқ. Өткен жылы ғимарат алдындағы алаң абаттандырылып, баспалдақтар мен жаяу жүргіншілер жолының жабыны жаңартылды. Ал 2025 жылдың қараша айында мұнда соғылған темір элементтермен безендірілген және «Karagandy 1934» жазуы бар жаңа аялдама павильоны орнатылды.
Маусым аяқталғанымен, театр ұжымы жаңа премьераларға дайындықты бастап кетті. 2026 жылдың қыркүйегінде театр 96-маусымын режиссер Вячеслав Виттих сахналаған «Пигмалион Хаос» спектаклімен ашады. Сонымен қатар режиссер Әлімбек Оразбековпен шығармашылық ынтымақтастық жалғасып, ол «Соқыр үміт» спектаклін қоюды жоспарлап отыр. Ал жас көрермендер үшін режиссер Александра Большакова дайындайтын жаңа жылдық ертегі сахналанбақ.