Осакаровкада жекеменшік ветеринарлық клиника ашылуға дайындалуда, онда үй жануарлары мен ауыл шаруашылығы жануарларының иелері қызметтердің кең спектрін ала алады. Жергілікті ветеринар Асхат Құсайыновтың кәсіби арманын жүзеге асыруға аудан әкімінің екі миллион теңге көлеміндегі гранты көмектесті.
Жаңадан бастаған кәсіпкердің ветеринарияға қызығушылығы бала кезінен пайда болды. Оның әкесі Қайрат Құсайынов зоотехник болып жұмыс істеді, сондықтан болашақ маман кәсіптік білім алғанға дейін жануарларды ұстау ерекшеліктерімен танысты.
Бүгінде ол ауданның жеке шаруашылықтары мен шаруа қожалықтарына қызмет көрсетеді. Оның тәжірибесінде жануарларды емдеу ғана емес, дезинфекция, дезинсекция және дератизация жүргізу де бар.
Ветеринарлық көмекке сұраныстың жоғары болуы Асхатты клиника құруға итермеледі. Ол үшін кәсіпкер өз қаражатына модульдік үй-жай сатып алды, ол қазір пациенттерді қабылдау үшін жабдықталады. Аудан әкімінің гранты айтарлықтай қолдау көрсетті: екі миллион теңге қажетті жабдықтарды сатып алуға бағытталды.
— Ауданда ветеринарлық көмек өте қажет. Таңертеңнен кешке дейін шығатын күндерім болады. Бір шаруашылықта жұмыс істеп жатқаныңызда, басқа елді мекендерден өтініштер келіп түседі. Сондықтан да тұрғындар өз үй жануарларын өз бетінше әкеле алатын емхана ашқым келеді. Аудан әкімінің гранты осы идеяны іске асыру үшін жақсы қолдау болды, — деді Асхат Құсайынов.
Жаңа клиникада жануарлар иелеріне қызмет көрсету кешені ұсынылады. Мұнда вакцинация, кастрация және стерильдеу, халықаралық ветеринарлық паспорттарды рәсімдеу арқылы чиптеу, сондай-ақ емдік және алғашқы ветеринарлық көмек көрсету жоспарланған. Емханамен бірге ветеринарлық дәріхана да өз жұмысын бастайды.
Кәсіпкер қызмет көрсетудің ыңғайлылығы мен сапасына ерекше назар аударуға ниетті. Әрбір пациент үшін жүргізілген емшаралар мен егулер туралы мәліметтер тіркелетін электрондық карточка көзделеді. Мұндай жүйе бақылау тарихын жүргізуге және иелеріне қайта вакцинациялау туралы уақтылы ескертуге мүмкіндік береді.
Биыл, ветеринар атап өткендей, көптеген шағымдар кенелердің тістеуі арқылы берілетін аурулармен байланысты болды. Мұндай жағдайлар ауданда ветеринарлық инфрақұрылымды дамыту қажеттігін тағы да дәлелдеді. Бұл ретте кәсіпкер анағұрлым күрделі диагностикалық көмек көрсету үшін клиниканы біртіндеп қосымша техникамен жарақтандыру қажеттігін түсінеді.
— Болашақта УДЗ аппаратын, рентген және зертханалық анализаторларды сатып алғымыз келеді. Бұл қымбат жабдық, сондықтан біртіндеп дамитын боламыз. Қазір басты міндет — емхананы іске қосу және тұрғындарды негізгі ветеринарлық қызметтермен қамтамасыз ету, — деп жоспарларымен бөлісті Асхат Құсайынов.
Қазір кәсіпкер үй-жайларды абаттандыруды аяқтап, қажетті құжаттарды рәсімдеуде. Ветеринарлық клиниканы ашу жыл соңына жлспарлануда.
Осакаров аудандық әкімдігінің ақпараты бойынша