Қарағандыда дрон операторлары дайындалып жатыр. Ұшқышсыз ұшу аппараттарын басқару курстары Қазақстан Республикасы ІІМ Бәрімбек Бейсенов атындағы Қарағанды академиясында және Әбілқас Сағынов атындағы техникалық университетте ашылған.
Қазіргі заманда дрондар жедел қызметтерге қылмыстарды ашуға, жоғалған адамдарды табуға және жолдар мен қоғамдық орындардағы тәртіпті бақылауға көмектеседі.
Оқу Қарағанды академиясы базасындағы заманауи зертханада өтеді. Мұнда бір уақытта 250 адамға дейін білім ала алады. Сонымен қатар, Әбілқас Сағынов атындағы техникалық университеттің әскери кафедрасында тағы 35 курсант ұшқышсыз аппараттарды басқаруды меңгеруде.
Курс өткен жылдың 1 қыркүйегінде басталды. Бағдарламаға байланысты оқу ұзақтығы бір жылдан екі жылға дейін созылады.
— Дайындық пәндерді кезең-кезеңімен меңгеру принципі бойынша ұйымдастырылған — теориялық негізден бастап нақты жағдайға барынша жақын практикалық қолдануға дейін. Бастапқы кезеңде ұшқышсыз ұшу аппараттарының құрылысы мен архитектурасы зерттеледі, сондай-ақ арнайы тренажерлерде дайындық жүргізіледі. Практикалық бөлім 15 автоматтандырылған жұмыс орны орнатылған оқу сыныбында іске асады, онда RadioMaster басқару пульттері қолданылады. Оқыту барысында Uncrashed, Liftoff, VelociDrone, DRL, DCL сияқты симуляциялық кешендер пайдаланылады, — деді арнайы әскерлердің жауынгерлік қолдану циклі кафедрасының бастығы, запастағы подполковник Марат Істимесов.
Теориялық дайындықтан кейін курсанттарды практикалық жаттығулар күтіп тұр. Оқу-жаттығу ұшулары алдымен жабық полигонда, кейін ашық алаңда өткізіледі. Болашақ мамандарды барлау жүргізуге және күрделі қалалық орта жағдайында дрондарды басқаруға үйретеді.
Сонымен қатар, Сағынов атындағы университетте пилотсыз ұшу аппараттары байланыс желілерінің атомдық жүйелерімен жұмыс істеу оқытылады — бұл дрондарды басқарудың әлеуетті, қорғалған жүйелері. Олар жоғары энергетикалық, радиоизотоптық қуат көздерін немесе кванттық коммуникация принциптерін пайдаланады. Мұндай технологиялар интернет қолданбай-ақ радио көпірлер арқылы бейнесигнал беруге мүмкіндік береді.
Биыл университет базасында ұшқышсыз ұшу аппараттарын құрастыру зертханасын ашу жоспарланып отыр.