18 жастағы қарағандылық ерікті жасөспірімнің өмірін сақтап қалуға үлес қосып, ерекше ерлігі үшін марапатқа ие болды

Бұл туралы Life09 ақпарат агенттігі 112 Qaragandy-ға сілтеме жасап хабарлайды.

Бірінші курс студенті Әділжанға алғыс хат пен естелік сыйлық табысталды, бұл оның батылдығы мен жанашырлығының айқын дәлелі.

2 сәуір күні ол әлеуметтік желіден жасөспірімнің жоғалғаны туралы хабарламаны көре салысымен, бір сәт те кідірместен іздеуге аттанды. Өзінің мотоцикліне мініп, ешкімді күтпей, жалғыз өзі айналаны шарлап, әрбір күмәнді жерді мұқият тексерді.

Табандылығы мен жауапкершілігінің арқасында Әділжан жоғалған оқушыны Дубовка кенті маңындағы өзен жағасынан аман-есен тауып алды. Оның бұл әрекеті нағыз ерлік пен адамгершіліктің үлгісі.

Осындай жүрегі кең, қайсар жастар барда қоғамның болашағы жарқын екені сөзсіз.